კითხვა-პასუხი - რომ არ ყოფილიყო იუდა, ეცვებოდა თუ არა ჯვარს ქრისტე? - აპოკალიფსისი

არსებობს აზრი, რომ ამ სამყაროში კონკრეტული ადამიანის მოქმედებაზე ბევრია დამოკიდებული. რაც გინდ აღასრულოს ადამიანმა: კარგი თუ ცუდი, ისტორია მისი საქციელის შესაბამისად მიედინება. კონკრეტულ ქცევაზე დამოკიდებულების ამ ეფექტმა მიიღო სახელწოდება - "პეპლის ეფექტი".

ჯვარზე ჩვენი მაცხოვრის სიკვდილი და მისი მკვდრეთით აღდგომა ჩვენი ცხონების საქმეა. გამოდის, რომ იუდაზე და მის გამცემლობაზე იყო დამოკიდებული კაცთა მოდგმის ცხონება? სინამდვილეში ეს ასე არ არის. იუდას ისტორია აჩვენებს, რაოდენ ღრმად შეიძლება დაეცეს უფლის მიერ არჩეული ადამიანი. ზოგიერთის მტკიცებით იუდა იყო კაცი, რომლის მკერდზეც მიეყრდნო მაცხოვარი (იოანე მიეყრდნო მაცხოვრის მკერდს). ის იყო უფლის ერთ-ერთი უახლოესი მოწაფე, რომელთანაც ჰქონდა დიდი ნდობა და მჭიდრო კავშირი.  მაცხოვარმა იუდას მიანდო მთელი სამოციქულო ხაზინა. მაგრამ იუდა მაინც გახდა ეშმაკის იარაღი. მან მიიღო კაცობრიობის მტრის შთაგონება და 30 ვერცხლად გაჰყიდა თავისი მაცხოვარი.

ჩვენ არ შეგვიძლია ვაღიაროთ, თითქოსდა კაცობრიობის ბედი კონკრეტული ადამიანის კონკრეტულ ქცევაზე იყოს დამოკიდებული, და ამისი უამრავი მტკიცებულება არსებობს. ჩვენ ვიცით, რომ სინედრიონში უკვე შეითქვნენ და გადაწყვეტილებაც მიიღეს მოეკლათ უფალი, და ხელსაყრელ დროს ეძებდნენ, რათა განეხორციელებინათ თავიანთი ჩანაფიქრი. იუდა მათ მხოლოდ იმაში დაეხმარა, რომ იპოვა ამისთვის შესაბამისი დრო და ადგილი. იმ მომენტში, როდესაც მან შეინანა და ფული დააბრუნა, მღვდელმთავრებმა მას აგრძნობინეს, რომ ამას უკვე აღარ ჰქონდა არანაირი მნიშვნელობა და აზრი.

იუდას რომ არ გაეყიდა, მაცხოვარს მაინც შეიპყრობდნენ და ჯვარს აცმევდნენ. შესაძლოა სხვა შემთხვევაში ისტორია წასულიყო სხვა სცენარით. შესაძლოა ეს მომხდარიყო ადრე თუ გვიან, ან ყველაფერი წასულიყო სხვანაირად, მაგრამ ეს მაინც მოხდებოდა.

ისტორია მიდის ისე, როგორც ის არის წინასწარმოხაზული (წინაგანსაზღვრულობის შესახებ იხ. სტატია: "მართლმადიდებლობა მომავალზე"). ღმერთმა წინდაწინ იცოდა ეს ყველაფერი. სახარება, რომელიც არ დაუწერია ვინმე დრამატურგს, ვითარდება იმგვარი დრამატურგიის კანონებით, რომლის მოფიქრება ადამიანს არ ძალუძს. ამ სამყაროში ფიზიკურ კანონებთან ერთად მოქმედებენ სულიერი კანონებიც, ასე რომ, მიუხედავად იმისა, გაყიდდა თუ არა ქრისტეს იუდა, მაცხოვრის ჯვარცმა მაინც მოხდებოდა, ოღონდ სხვა პიროვნების მიერ და სხვა ვითარებაში.