კატეხიზაცია - მართლმადიდებლური რწმენის შესახებ. სარჩევი - აპოკალიფსისი

ძმანო! ჩვენ მართლმადიდებელ ქრისტიანებად ვიწოდებით: თუ გახსოვთ, რატომ ვიწოდებით ასე? იმიტომ, რომ მივიღეთ წმიდა ნათლისღება და ვიღებთ სხვა საიდუმლოებებს ქრისტეს მართლმადიდებლურ ეკლესიაში, მივდევთ მართლმადიდებლური ეკლესიის სწავლებას და ვხელმძღვანელობთ მათით, ან, მოკლედ რომ ვთქვათ: მართლმადიდებელ ქრისტიანებად ვიწოდებით იმიტომ, რომ შევიცავთ მართლმადიდებლურ რწმენას.

მართლმადიდებლური რწმენა ის რწმენაა, რომელიც სწორად, მართლად და ჭეშმარიტად ასწავლის ღმრთის დიდებას, ანუ უცდომელად რწმენას ღმრთისადმი და მის თაყვანისცემას ცხონების მისაღწევად.

სხვაგვარადაც შეგვიძლია ვთქვათ: მართლმადიდებლური რწმენა არის ის ერთადერთი ჭეშმარიტი სარწმუნოება, რომელიც ქრისტემ, ქვეყნიერების მაცხოვარმა, ასწავლა თავის მოწაფეებს და მოციქულებს. ეს რწმენა მოციქულებმა თავიანთი ქადაგებით გაავრცელეს მთელ ქვეყნიერებაზე, და წერილობითაც გადმოგვცეს.

მოციქულთა ეს რწმენა მიიღეს მათმა მემკვიდრეებმა, წმიდა მამებმა და მსოფლიო მოძღვრებმა. ეს რწმენა თავიანთი კანონებითა და დადგენილებებით დაადასტურეს და ყოველგვარი ცრუსწავლებებისგან შემოზღუდეს მსოფლიო და ადგილობრივმა მართლმადიდებლურმა კრებებმა. ეს რწმენა დღემდე უცვლელია და მას იუწყება ქრისტეს მართლმადიდებლური საყოველთაო (კათოლიკე) ეკლესია.

თუკი ვინმე თქვენგანს ჰკითხავენ: რატომ იწოდებით მართლმადიდებლურ ქრისტიანებად? უპასუხე: იმიტომ, რომ მე შევიცავ მართლმადიდებლურ რწმენას, ანუ ღმრთის სწორ და მართებულ თაყვანისცემას, ასევე მართებულ ღვთისმსახურებას, რომელსაც ასწავლის ქრისტეს მართლმადიდებლური ეკლესია, და ჩემს რწმენასა და ჩემს საქმეებში განუხრელად ვხელმძღვანელობ სწორედ მართლმადიდებლური ეკლესიის სწავლებით, რის გამოც განვეშორები ყოველგვარ მწვალებლობას, სქიზმას და ცრუმოძღვრებას.

ვიწოდებით რა მართლმადიდებელ ქრისტიანებად, ჩვენ უნდა გვახსოვდეს, რომ ყოველთვის უნდა ვატაროთ და სულში ვზარდოთ ჭეშმარიტი რწმენა და, ამ რწმენის ხელმძღვანელობით, აღვასრულოთ ქრისტეს მცნებები. რადგან, ცხონების მისაღწევად, აუცილებელია ჭეშმარიტი რწმენა და კეთილი საქმეები.

რწმენის აუცილებლობის შესახებ წერილი ბრძანებს: "რწმენის გარეშე კი შეუძლებელია ესათნოვო ღმერთს" (ებრ. 11:6). ღმრთის სათნოყოფა შეუძლებელია რწმენის გარეშე, რადგან ჩვენ მხოლოდ რწმენით ვიღებთ შემეცნებას ღმრთისა და მისი საქმეების შესახებ; რწმენის მიერ შევიმეცნებთ მის წმიდა ნებას, და ვითავისებთ ქრისტე მაცხოვრის დამსახურებებს, ღმრთის წინაშე ჩვენს გასამართლებლად.

კეთილი საქმეების შესახებ ღმრთის სიტყვა ასწავლის: "საქმის გარეშე რწმენა მკვდარია" (იაკ. 2:20); ჭეშმარიტი რწმენა აუცილებლად უნდა იყოს შეერთებული კეთილ საქმეებთან. თუ ვიტყვით, რომ ღმრთისა გვწამს, უნდა ვიცოდეთ სწავლება ღმრთისა და მისი საქმეების შესახებ, უნდა ვიცოდეთ მაცხოვრისა და მისი მეშვეობით ცხონების შესახებ; მაგრამ ამავდროულად თუკი არ შევასრულებთ ღმრთის მცნებებს, არ ვიცხოვრებთ იესუ ქრისტეს სწავლების მიხედვით, ჩვენი რწმენა არაჭეშმარიტი გამოდგება; ჩვენი რწმენა აღმოჩნდება უნაყოფო ან მკვდარი, რომელიც ვერ შეძლებს ჩვენს ცხონებას.

ამრიგად, ვიწოდებით რა მართლმადიდებელ ქრისტიანებად, ჩვენ ყველაზე უმეტესად უნდა ვიზრუნოთ იმაზე, რათა მუდმივად ვატაროთ ჩვენს სულში და ვზარდოთ ჭეშმარიტი რწმენა ჩვენი უფლისა და მაცხოვრის იესუ ქრისტეს მიმართ, დავადასტუროთ ჩვენი რწმენა ღმრთისა და ადამიანების წინაშე კეთილი საქმეებით და მცნებათა აღსრულებით.

მართლმადიდებლური რწმენის სწავლება მომდინარეობს საღმრთო გამოცხადებიდან: ამიტომაც შემდეგ სწავლებაში მოგიყვებით სწორედ საღმრთო გამოცხადების შესახებ.

მამებო და დედებო, ასევე თქვენ, ვინც მათ ადგილს იკავებთ! რაც აქ გესმათ და კიდევ მომავალში მოისმენთ, ეცადეთ, რამდენიც შეძლოთ, გადასცეთ თქვენს შვილებს. ხშირად ესაუბრეთ მათ მართლმადიდებლური რწმენის შესახებ. შთააგონეთ მათ, რომ მართლმადიდებლური რწმენა უდიდესი საგანძურია ადამიანისთვის, რადგან მის გარეშე შეუძლებელია ესათნოვო ღმერთს და მიაღწიო მარადიულ ნეტარებას. უთხარით მკათ, რომ ყოველი მართლმადიდებელი ქრისტიანი, ცხონების მისაღებად, იესუ ქრისტეს სწავლების თანახმად, აუცილებლად უნდა იყოს ღმრთის მორწმუნე, თავისი რწმენა კი დაამტკიცოს კეთილი საქმეებით, უფლისა და მაცხოვრის მცნებათა აღსრულებით. რადგან, თვით წმიდა მოციქულთა თქმით, "რწმენის გარეშე შეუძლებელია ესათნოვო ღმერთს" (ებრ. 11:6), და "რწმენა, საქმის გარეშე, თავისთავად მკვდარია" (იაკ. 2:17).

ქრისტე მაცხოვარმა და ღმერთმა ჩვენმა, სულიწმიდის მადლით, მოგანიჭოთ ძალა და მოშურნეობა მისი საღმრთო სწავლების შესამეცნებლად, მისი წმიდა მცნებების დასაცველად, მის სადიდებლად მამასთან და სულიწმიდასთან ერთად. ამინ.