განმარტებანი - ღმრთის მსჯავრის ნიშნები და მართებული დამოკიდებულება წუთისოფლისამი - აპოკალიფსისი

მღვდელმოწამე პიონიუს სმირნელი († 250): "იფიქრეთ ამ ცხოვრებაზე: ის წააგავს კალოს, სადაც მიწაზე დგას დიდი ზვინი, - რისი? ხორბლისა და ღვარძლის! როდესაც მუშა მოვა ნიჩბით გასანიავებლად, მაშინ მსუბუქ ღვარძლს ქარი იოლად გაფანტავს, ხორბალი კი მიწაზე დარჩება. შეხედეთ ზღვაში ჩაგდებულ ბადეს: რაც მისით ამოაქვთ ყველაფერი კარგია? არა! ასეა წუთისოფლის ცხოვრებაც. როგორ გსურთ, რომ ვიტანჯოთ: როგორც დამნაშავეებმა, თუ როგორც უდანაშაულოებმა? თუკი - როგორც დამნაშავეებმა, მაშინ თქვენც უნდა იტანჯოთ, რადგან საკუთარი საქმეები გამხელენ უსამართლობაში; ხოლო, თუ როგორც - უდანაშაულოებმა, მაშინ, თქვენ, უსამართლოებს, რა სასოება უნდა გაგაჩნდეთ ცხონებაზე, თუკი მართლები დატანჯეთ: "თუკი მართალი ძლივსღა ცხონდება, უკეთური და ცოდვილი სადღა იყოს?" (1 პეტ. 4:18)?