აპოკალიფსისი > ანტიქრისტე
დღეს იძლევიან თუ არა ანტიქრისტეს ბეჭედს?
"აპოკალიფსისის" რედაქციისგან: დღეს მართლმადიდებელ ქრისტიანთაგან მრავალს აღელვებს ისეთი საკითხები, როგორიცაა შტრიხ-კოდები, ჩიპიანი პასპორტები, საგადასახადო ნომრები და სხვა. ამ თემას მრავალი სტატია და წიგნი მიეძღვნა, რომლებშიც გადმოცემულია ავტორთა განსხვავებული ხედვები. რადგან მოცემული პრობლემა არსებობს საქართველოშიც, გადავწყვიტეთ შეგვერჩია ჩვენი აზრით ყველაზე საინტერესო ნაშრომები და მკითხველისთვის მიგვეწოდებინა. ქვემოთ გთავაზობთ ცნობილი დიაკვნის, ანდრია კურაევის ნაშრომის "იძლევიან თუ არა დღეს "ანტიქრისტეს ბეჭედს"?" პირველ თავს, რომელიც ჩვენთვის და მრავალი მართლმადიდებელი ქრისტიანისთვის საინტერესო საკითხებს ეხება. ა. კურაევის წიგნიდან გთავაზობთ პირველი თავის შემდეგ ქვეთავებს:
1. რაში მდგომარეობს პრობლემის არსი?
2. არის თუ არა "მხეცის რიცხვი" შტრიხ-კოდში?
3. არის თუ არა "მხეცის რიცხვი" საგადასახადო ნომერში?
4. ართმევს თუ არა "ნომერი" სახელს?
5. ვნებს თუ არა მართლმადიდებელ ქრისტიანს "შემოგდებული" უწმინდურობანი?
6. როგორ ვიცნოთ ანტიქრისტე?
7. ვინ და ვის მისცემს "მხეცის ბეჭედს"?
8. რა არის "მხეცის ბეჭედი"?
9. ნიშნავს თუ არა ისნ-ის მიღება ანტიქრისტეს რწმენასთან დათანხმებას?
10. რატომ არ კითხულობენ ტაძარში აპოკალიფსისს?
11. ართმევს თუ არა კომპიუტერი თავისუფლებას?
12. არის თუ არ ცოდვა ისნ-ის მიღება?
ავტორი: დიაკვანი ანდრია კურაევი.
ისნ (ინდივიდუალური საგადასახადო ნომერი. რუს. ИНН – "აპოკ." რედ.) - არის აბრევიატურა, რომელიც აღნიშნავს საგადასახადო სამსახურის ერთ-ერთ სიახლეს და, რომელიც მრავალი მითქმა-მოთქმის საგანი გახდა, ხოლო საიდენტიფიკაციო ნომრების მინიჭება - გააფთრებულ დისკუსიებს იწვევს; ამ თემას ჰყავს მრავალი მომხრეც და მოწინააღმდეგეც, მან ძლიერი საზოგადოებრივი რეზონანსი გამოიწვია, განსაკუთრებით მართლმადიდებელ მორწმუნეთა შორის. ყოველდღიური სამსახურეობრივი სფეროებიდან ისნ-ის თემა სულიერი ცხოვრების რეალიებში გადავიდა და ავისმომასწავებელი აზრი მიიღო.
• არის თუ არა "მხეცის რიცხვი" შტრიხ-კოდებსა და საგადასახადო ნომრებში?• არის თუ არა საშიში ქრისტიანთათვის სახელმწიფო რეგისტრაცია?• არის თუ არა ცოდვა ისნ-ის მიღება?
ამ და სხვა კითხვებს პასუხობს წიგნი, რომელიც წმიდა წერილსა და წმიდა მამათა თხზულებებზე დაყრდნობით წარმოადგენს სერიოზულ საღვთისმეტყველო დასკვნებს.
ღმერთმა აკურთხოს ყველა ისმინოს და მართებულად შეაფასოს წიგნში მოცემული ყველა არგუმენტი, მოიპოვოს სულიერი სიმშვიდე, მოიხვეჭოს მორჩილების სული ერთ, წმიდა, საყოველთაო და სამოციქულო ეკლესიასთან ერთად.
1. რაში მდგომარეობს პრობლემის არსი?
რომელიღაც სახელმწიფომ გადაწყვიტა მკაცრად გააკონტროლოს თავისი მოქალაქეების ცხოვრება. მიანიჭა რა საკუთარ თავს სასტიკი მბრძანებლის სახე, რომელსაც სურს მკაცრი აღრიცხვისა და კონტროლის შემოღება თავის სამფლობელოებში, მან თავისი მოქალაქეების "დათვლა და სახელების შერქმევა" დაიწყო.
აიღებს სახელმწიფო ვინმე მოქალაქე პეტრე ლისენკოს (სახელი და გვარი პირობითია - "აპოკ." რედ.), რომელიც აღრიცხული ჰყავს და ამცნებს: "დღეიდან მე შენ გიწოდებ: "საიდენტიფიკაციო ნომერს 482794456719". და დღეიდან, ყოველთვის, როდესაც ის, ვინც ოდესღაც იყო პეტრე ლისენკო, რაიმე ურთიერთობაში შესვლას დააპირებს მშობლიურ სახელმწიფოსთან, ვალდებული იქნება ახსენოს ნომერი, რომელიც მას სახელმწიფომ უბოძა, და სანამ შენ სრულად არ წარდგები მის წინაშე და არ ამცნებ შენს ციფრულ ზედწოდებას, სახელმწიფო გამორთული ვიდეოკამერის უქმე თვალივით ზედაც არ შემოგხედავს. ამიერიდან სახელმწიფოსთვის სულაც არა აქვს მნიშვნელობა რა შეგარქვა საკუთარმა დედამ; მას სულაც არ აინტერესებს რა სახელი გიწოდა ეკლესიამ ნათლისღების საიდუმლოში; დღეიდან სახელმწიფოსთვის შეფუთული ხარ ისე, როგორც ეს მოხერხებულია კომპიუტერული მანქანისთვის.
მრავალმა იგრძნო როგორი ახალი და შემაძრწუნებელი სიცივე შემოიჭრა მოქალაქეებისა და სახელმწიფოს ურთიერთობაში. ყურადღებას ძაბავს ცნობა იმის შესახებაც, რომ ადამიანს ამიერიდან მიანიჭებენ არა 12 ციფრიან, არამედ 15 ციფრიან ნომერს. თურმე, კომპიუტერული შტრიხ-კოდის სახით ამ საგადასახადო ნომრის (საიდენტიფიკაციო კოდის) ჩაწერის დროს ეს 12 ციფრი სამი ხაზის დახმარებით იყოფა სამ ჯგუფად, სადაც ყოველი ჯგუფის გამყოფი ხაზი ისეა დახაზული, რომ გრაფიკულად არაფრით განსხვავდება იმ ჯგუფის ხაზისგან, რომლის რიცხვი აღნიშნავს ექვსს. მაშასადამე, ყოველი კოდი თავის თავში შეიცავს სამმაგ მინიშნებას ციფრ 6-ზე. ციფრების ამგვარი შეხამება კი უკვე ბევრად უფრო მეტია, ვიდრე უბრალო კომპიუტერულ-მათემატიკური პირობითობა. შედგენილი ექვსიანები (666) მიეკუთვნება არა მარტო და არა იმდენად მათემატიკას, რამდენადაც რელიგიას. უკვე ორი ათასი წელია ადამიანები ელიან, როდის შემოვა მათ ისტორიაში სწორედ ეს რიცხვი ("ანტიქრისტეს ბეჭედი"), რომელიც ისტორიის უკანასკნელი ჟამის დადგომის ნიშანი აღმოჩნდება.
და აი, აღმოჩნდა, რომ თითქოსდა დამოუკიდებელ პოსტსაბჭოურ სახელმწიფოებში პრაქტიკულად ერთდროულად გაიღვიძა ერთმა და იმავე სურვილმა: მოლდავეთმა, ყაზახეთმა, უკრაინამ, ბელორუსიამ, რუსეთმა ისურვეს თავიანთი მოქალაქეები გადაეყვანათ კომპიუტერულ ენაზე. თანაც ისე, რომ ამ სახელს თითქოსდა მიემატება სამი ექვსიანი.
ადამიანების სინდისი შეშფოთდა: "სახელმწიფო ანტიქრისტეს ბეჭდის მიღებას გვაიძულებს!" ზოგიერთმა მღვდელმსახურმა განაცხადა, რომ ადამიანები, რომლებიც საგადასახადო ნომრიან სახელმწიფო დოკუმენტებს აიღებს, მით უარყოფს ქრისტეს და ამიტომაც ვეღარ ჩაითვლება ქრისტიანად, მაშასადამე, შეუძლებელია მისი დაშვება საეკლესიო საიდუმლოებებზე. თუმცა, რა თქმა უნდა, გამოჩნდნენ სხვა მქადაგებლებიც, რომლებმაც თქვეს, რომ არაფერი განსაკუთრებული აქ არ ხდება და ამიტომაც შეიძლება "სამი ექვსიანის" მქონე დოკუმენტების მიღება ყოველგვარი შეშფოთების გარეშე.
მაშ, როგორი შეიძლება იყოს სინამდვილეში საგადასახადო ნომრის გავლენა ადამიანის სულზე? მოდი ვცადოთ ამ საკითხში გარკვევა რაც შეიძლება მშვიდად.
უცნაური სიჯიუტე გადახაზო და დააუჯრედო ჩვენი ცხოვრება (თანაც სიმბოლოების დახმარებით, რომლებიც ექვსიანებს წააგავს), რა თქმა უნდა, დაბნეულობას და ქრისტიანთა წინააღმდეგობას იწვევს. მაგრამ ნებისმიერ წინააღმდეგობაში აუცილებელია მკაფიოთ იქნას განსაზღვრული: საიდან მომდინარეობს საშიშროება, რაში მდგომარეობს იგი, ასევე განისაზღვროს საშიშროების თავიდან აცილების თანმიმდევრობა, თუ ის რამოდენიმე წყაროდან მოდის.
ჩვენი არგუმენტების მოსმენა თუ არ სურთ - მითუმეტეს უფრო ფრთხილნი და აწონ-დაწონილნი უნდა ვიყოთ არგუმენტების შერჩევისას, რათა არავინ შეძლოს მათი დაცინვა (1),ჩვენ კი მათ გამო პანიკიორები გვიწოდონ.
__________________
1. სასაცილოა არგუმენტი, რომ თითქოსდა "საიდენტიფიკაციო კოდი - ეს არის ფიზიკური პირის ნომერი, ხოლო ფიზიკური პირი - ეს არის უსულო სხეული!" (გაზეთ "Жизнь вечная" მასალებისგან შედგენილი ფურცლებიდან). თუკი ამ სიტყვათშეხამებას იურიდიული ენიდან საღვთისმეტყველო ენაზე გადავთარგმნით, ზუსტად არავითარი მკრეხელობა აქ არ აღმოჩნდება: სიტყვა "ფიზიკური" - მომდინარეობს ბერძნულიდან "ფიუსის" - ბუნება; ხოლო "პირი" - ბერძნულად გამოითქმის როგორც პროსოპონ ან იპოსტასი. ასე რომ, ბუკვალურად სიტყვათშეხამება "ფიზიკური პირი", ნიშნავს პირს, რომელიც წარმოადგენს ერთგვარ არსებას ან ატარებს რაიმე ბუნებას. მამა, ძე და სულიწმიდა არიან საღმრთო ბუნების პირნი, ხოლო ადამიანები - ადამიანური ბუნების პირნი...
__________________
ამიტომც ღირს გავერკვეთ იმ არგუმენტებში, რომლებიც უკვე გამოთქმულია სრულიად ბუნებრივი ქრისტიანული დაპირისპირების პროცეში ტოტალური "კოდიფიკაციის" წინააღმდეგ, და ვნახოთ, რამდენი მათგანია აღმოცენებული შეცბუნებულობისგან, მიკერძოებულობისგან ან დაბნეულობისგან, და რამდენი არგუმენტია მართლაც შინაარსიანი და კარგი, რომელიც უფრო გასაგებს ხდის ჩვენს პოზიციას "გარეშეთათვის", და უფრო შეესაბამება თვით მართლმადიდებლური ეკლესიის ტრადიციას.
"ნომრების" ირგვლივ ატეხილი პოლემიკა საკმაოდ ჭკუის სასწავლია. თავიდან ყველა საეკლესიო ადამიანის დამოკიდებულება საკმაოდ ნეგატიური იყო. მაგრამ პირველივე მცდელობა შეგნებულ ყოფილიყო მიმდინარე პროცესი და გამომუშავებულ ყოფილიყო მოფიქრებული რეაქცია პირდაპირ გაქელილ იქნა ლოზუნგებით "ანტიქრისტეს ბეჭდის" შესახებ. არავინ უწყის საიდან წარმოიშვა ეს ვარაუდი, რომელიც თავიდან დასანან პოლემიკურ გადაჭარბებად ჩანდა და, რომელზეც არ ღირდა ყურადღების გამახვილება. მაგრამ შემდეგ აღმოჩნდა, რომ ეს შეძახილები საერთოდ ბლოკავენ ხელისუფლებასთან საღი დიალოგის ყოველგვარ შესაძლებლობას (ან შეურაცხადი ხულიგნების იარლიყს გვაკერებენ). მეტიც, "ნომრების" ისტერიულმა გაიგივებამ "ანტიქრისტეს ბეჭედთან" სწრაფად დაიწყო შიდასაეკლესიო ერთობის ღრღნა და ადამიანები განხეთქილებისკენ წააქეზა. და აი უკვე პატრიარქ ალექსი II-ის ბოლო მიმართვაში ისნ-თან, "გლობალიზაციასთან" და "ხელისუფლებასთან" დაპირისპირების თემა საერთო არ ისმის, სამაგიეროდ "ნომრების" წინააღმდეგ გამოსულ მებრძოლთა მიმართ მძაფრი სიტყვები გაისმის...
დიალოგებმა "საგადასახადო ნომრების" გარშემო აჩვენა, რომ საეკლესიო გარემოშიც კი იქმნება ზოგჯერ ისეთი ვითარება, რომელიც ჩვენთვის ცნობილია საერო ყოფიერებიდან და ისტორიიდან. იყვნენ თუ არა ბოლშევიკები სახალხო განწყობის გამომხატველნი თვით რევოლუციის დაწყების წინ? - არა. მაგრამ, ისინი ბევრს ხმაურობდნენ და სხვაზე უფრო მეტად იყვნენ მონდომებულები. მათი ოპონენტები საკმაოდ კარგად ერკვეოდნენ საშუალებებში და საკმაოდ დარწმუნებულნი იყვნენ ცხოვრების ტრადიციული წესის საფუძვლიანობასა და შეურყეველობაში იმისთვის, რომ კომუნისტ აგიტატორებთან შესულიყვნენ სერიოზულ პოლემიკაში. დღეს იგივეს ვხედავთ ვინმე ფომენკოს "აღმოჩენებთან" დაკავშირებით. მისი წიგნები "ახალ ქრონოლოგიებზე" უზარმაზარი ტირაჟებით გამოდის და ყოველი ქუჩის კუთხეში იყიდება. მაგრამ მთელი წლის განმავლობაში მეცნიერება მათზე არანაირად რეაგირებდა. სერიოზული ისტორიკოსები თავიანთი ღირსების დაკნინებად მიიჩნევდნენ ბულვარული "მეცნიერების" კრიტიკას. მაგრამ ობივატელის ცნობიერებაში ეს ნიშნავდა, რომ ფომენკომ ყველას ხმა გააკმენდინა, რომ თვით მეცნიერებათა აკადემიასაც კი არაფერი აქვს სათქმელი მისი არგუმენტების საპასუხოდ... მოკლედ, ხულიგანი ყოველთვის ხმაურობს და ჩვეულებრივ ინტელიგენტ ადამიანზე უფრო შესამჩნევია.
ერთი, "საკუთარი იდეით" შეპყრობილი ადამიანი, ყოველთვის უფრო აქტიურია ტრადიციული აზროვნებისა და ცხოვრების წესის მიმდევარ ას ადამიანზე; და აი, ისინიც, ვინც საგადასახადო ნომერში და შტრიხ-კოდში "ანტიქრისტეს ბეჭედი" მოიაზრა, ისე მიზანსწრაფულად მოწყდნენ თავიანთ ადგილებს და გადაეშვნენ პრესისა და ინტერნეტის ვირტუალურ სამყაროში, რომ ყველას მოეჩვენა, თითქოსდა მათი შეხედულება ერთადერთი შესაძლო აზრია ქრისტიანისთვის.
ჩემს მოგზაურობებში ეპარქიებს შორის, სასულიერო პირებთან და საეკლესიო ადამიანებთან შეხვედრებში ყოველთვის გაკვირვებული ვრჩებოდი: როგორ არ წააგავს რეალური საეკლესიო რუსეთი მის იმ სახეს, რომელსაც ქმნის მოსკოვის ვითომ რელიგიური პრესა და ინტერნეტი. ამ უკანასკნელთ თუ დავუჯერებთ, ინდივიდუალური საგადასახადო ნომრის გარდა, სხვა პრობლემები საერთოდ არ გვაქვს. ამ უკანასკნელთ თუ ვენდობით, მთელი "ეკლესია" (პატრიარქიდან მოყოლებული მხცოვნებით დამთავრებული) - გადაჭრით მოუწოდებს თითიც კი არ შეახონ ინდივიდუალურ საგადასახადო ნომრებს, ხოლო დიაკვანი ანდრია კურაევი კადნიერად ირწმუნება საწინააღმდეგოს.
მაგრამ სასულიერო პირთა ეპარქიალურ შეკრებებზე სურათი სულ სხვანაირი იყო: ერთი-ორი აქტივისტი, რომელიც კოპებშეკრული ებრძოდა "ანტიქრისტეს ბეჭედს" დაშტამპულ დოკუმენტებში, უფრო ხშირად იწვევდა არა იმდენად პოლემიკას ყველა დანარჩენ მღვდელთაგან, არამედ დაღლილობას და გაღიზიანებას... მღვდელმთავართა, მღვდელთა და ბერ-მონაზონთა რეალური შეხედულებები საკმაოდ განსხვავებული იყო იმისგან, რაც შეიძლებოდა გვეფიქრა, მოსკოვის ორიოდ გაზეთი ერთადერთი წყარო რომ ყოფილიყო ეკლესიის განწყობის შესახებ.
და მაინც, დისპროპორცია აშკარა იყო: ოფიციალური საეკლესიო გამოცემები უბრალოდ გაურბოდნენ ამ თემას და შემოიფარგლებოდნენ 2000 წლის 7 მარტის სინოდის ეპისტოლეთი (იხ. თავი "ოფიციალური საეკლესიო წყაროები ისნ-ის შესახებ"). საღად მოაზროვნე ადამიანს ყოველთვის ეჩვენება, რომ საკმარისია ჭეშარიტება ითქვას ერთხელ და შემდეგ უკვე აღარ არის საჭირო ღია კარების მტვრევა. სულ სხვა განწყობა აქვს "პროპაგანდისტს". საერთო ჯამში საეკლესიო ცხოვრება მივიდა იმ ზღვრამდე, რომლის იქით ამოძრავდნენ განხეთქილების აჩრდილები.
მინდა აღვნიშნო, რომ წინამდებარე გამოკვლევაში არგუმენტები მოძიებულია ჩემს მიერ, მაგრამ დასკვნები - ზოგადეკლესიურია. ის, რომ მე გავბედე დამეწერა წიგნი ესოდენ პოლემიკურ თემაზე, არ ნიშნავს, თითქოსდა მე ისეთი დიდი წარმოდგენისა ვარ საკუთარ თავზე, რომ არ შემიძლია არ გამოვთქვა საკუთარი სიტყვა გახურებულ დისკუსიაში. პირიქით, სწორედ იმიტომ, რომ არ ვენდობი საკუთარ თავს და საკუთარ შედებულებებს, - მუდმივად ვადარებდი ჩემს "რეაქციებს" მრავალთა რჩევებთან (განსაკუთრებით წინა საუკუნეების წმიდა მამებთან და ასევე დღევანდელი ეკლესიური ადამიანების შეხედულებებთან)...
დავამ "ნომრების" გარშემო კვლავ დააყენა საეკლესიო ცხოვრების მნიშვნელოვანი პრობლემა: ადამიანებს არ ესმით - რა მიიჩნიონ "ეკლესიის ხმად". პატრიარქის და ეპისკოპატის მსჯელობა? კანონიკური გადმოცემა ამტკიცებს, რომ დიახ. მაგრამ, რაც უნდა უცნაური იყოს, სწორედ ის ადამიანები, რომლებსაც საეკლესიო გადმოცემების დამცველებად მოაქვთ თავი, საჭიროდ თვლიან უარყონ საეკლესიო გადმოცემის ეს კანონიკური ნაწილი. მხცოვანთა ხმა? - ამ საკითხში მათი აზრი გაიყო.
მაშ, რატომ მიმაჩნია, რომ ის დასკვნები, რომლებიც დასაბუთებულია ამ წიგნში, წარმოადგენს სწორედ ეკლესიის მსჯელობას?
დიახ, მე ვიცი, რომ ზოგიერთ პატივსაცემ სასულიერო პირს და მოძღვარს უფრო საგანგაშო დამოკიდებულება აქვს "ნომრებთან" (თუმცა, უნდა აღინიშნოს, რომ თავიანთ ამ განგაშს ისინი გამოთქვამენ მხოლოდ ზოგიერთ სულიერ შვილთან საუბარში, და არანაირად საჯაროდ). მაგრამ მათი შეხედულება არ შეიძლება არქიმანდრიტ იოანეს (კრესტიანკინი) მსჯელობაზე უფრო მნიშვნელოვანი იყოს. პლიუს ამას კიდევ ის, რომ იოანეს მხარეს არის პატრიარქისა და სინოდის, ასევე ეპისკოპოსთა უმრავლესობის ხმა. ამავე თეფშზე დებენ თავიანთ ხმას სასულიერო სკოლები და ღვთისმეტყველები (როგორც ეს აჩვენა სინოდალური საღვთისმეტყველო კომისიის პლენუმმა, რომელზეც არავინ ღვთისმეტყველთაგან არ ამტკიცებდა "კოდების" სულიერ მავნეობას). ასე რომ ის დასკვნა, რომელსაც მე ამ წიგნში ვასაბუთებ (ნომრების მიღება არანაირად არ არის ცოდვა), - სწორედ საეკლესიო დასკვნაა, და არა მხოლოდ ჩემი კერძო შეხედულება.
ეს წიგნი, რაც გინდ უცნაური იყოს, ბევრ ადამიანს დაამწუხრებს. მე ხომ იმის დამტკიცებას ვაპირებ, რომ ინდივიდუალური საგადასახადო ნომერი (რუს.: ИНН – "აპოკ". რედ.) – არ არის "მხეცის ბეჭედი", რომ პუტინი - სულაც არ არის ანტიქრისტე და, რომ დღეს ჯერ კიდევ არ დამდგარა ბოლო დროება... თითქოსდა ადამიანებს უნდა უხაროდეთ, როდესაც ესმით, რომ უკანასკნელი შიშის საგანი ჯერაც შორსაა. მაგრამ არც ისე იშვიათად ვხედავ, თუ როგორ მუქდება ისნ-ის მავნეობის მიმღებ ადამიანთა პირისახე, როდესაც ეს ესმით. მათ ხომ საყვარელ ჩხრიალას ართმევენ...
არადა, საკუთარ თავზე მახსოვს, როდესაც პირველად მესმა "შტრიხ-კოდებისდა" და "მიკროჩიპების" შესახებ (ბუნებრივია, აპოკალიპტური მსჯელობების კონტექსტში) - რაც გინდ უცნაური იყოს, გამიხარდა. აქ უცებ რამოდენიმე კომპლექსი ამოქმედდა.
პირველი, ეს არის საერო ბიჭუნას კომპლექსი: "ეჰ, გვიან დავიბადეთ! უკვე არც ომებია, არც რევოლუციები! ვერსად ჩაიდენ გმირობას!". შენ კი გეუბნებიან: აი ახლა, შენს დროში, შენი თანდასწრებით გათამაშდება მსოფლიო ისტორიის უმთავრესი მოვლენები. შენ, პირადად ნახავ ანტიქრისტესაც და ქრისტესაც, ილიასაც და ენოქსაც...
მეორე, ნეოფიტის კომპლექსი, რომელიც თვითონ ჯერაც მუდმივად დავობს თავის ძველ ურწმუნო მეგობრებთან და თავის ადრინდელ რწმენებთანაც: აი, ახლა ყველანი იხილავენ, რომ მართალი ვიყავი, ყველა დაინახავს ჩემი ახალი რწმენის დადასტურებას - ის მოვლენები, ის სასწაულები, რომლებზეც მსჯელობს ბიბლიის ბოლო ფურცლები.
მესამე, ტელემაყურებლის კომპლექსი: ნახავ საშინელებას, მაგრამ არ დაზიანდები.
და, გეჩვენება, რომ კვლავ ხორციელდება ის, რაც დიდი ხანია შემჩნეული აქვთ ფილოსოფოსებს: რუსი კაცისთვის უფრო ადვილია კარგად მოკვდეს, ვიდრე კარგად იცხოვროს. ადვილია ერთხელ და ბოლომდე შეასრულო შენი მოვალეობა, ვიდრე ასრულო იგი ყოველდღიურ ღვაწლში... და აი, რაოდენ ხელსაყრელი შემთხვევა გეძლევა: თამამად მიაფურთხე სახეში ანტიქრისტეს (იმ საქონლის გაყიდვის გაპროტესტებით, რომლებზეც შტრიხ-კოდებია) და აგარაკზე რამოდენიმე თვიანი ცხოვრების შემდეგ პირდაპირ სამოთხეში ახვალ...
მოკლედ, - მრავალი "გრძნობა" იყო ჩადებული "შტრიხ-კოდებზე" ამგვარი ადამიანების რეაქციაში. ახლა კი მოდი ვცადოთ გავიხსენოთ, რომ სიტყვებს "თეოლოგია" და "ლოგიკა" ერთი ფუძე გააჩნიათ. მოდი ვცადოთ ჩვენი ემოციები შევათანხმოთ წმიდა წერილის სიტყვებთან, საეკლესიო გადმოცემასთან, იმ ადამიანების მსჯელობასთან, ვისაც უფალმა მიანდო მისი ეკლესიის გაძღოლა ათასწლეულების საზღვრებს მიღმა, და ასევე გონიერების ხმასთან.
არის თუ არა "მხეცის რიცხვი" შტრიხ-კოდში?
კომპიუტერული ტექნიკის ზოგიერთი სპეციალისტი ამბობს, რომ არის; სხვები კი უარყოფენ. სინოდალური საღვთისმეტყველო კომისიის ექსპერტული დასკვნები, რომელიც წარმოადგინა არქიმანდრიტმა ტიხონმა (შევკუნოვი), ამტკიცებენ, რომ კომპიუტერი ვერ ხედავს რიცხვ 666-ს შტრიხ კოდში (2).
__________________
2. მირქმის მონასტრის ინტერნეტ-საიტზე ჩატარდა ღია დისკუსია, რომლის შედეგად მივიღეთ მტკიცე ექსპერტული განმარტება იმის შესახებ, რომ შტრიხ-კოდი EAN-13 თუმც არ შეიცავს ელექტრონული სახით რიცხვ 666-ს, ან სხვანაირად რომ ვთქვათ, სამ ექვსიანს, რადგან მანქანა არ კითხულობს გრძელ გამყოფ ხაზებს, როგორც 666-ს, მაგრამ ვიზუალურად, იმ ადამიანისთვის, ვინც იცის მანქანის ენა, ეს პარალელური ხაზები სწორედ ციფრ 6-თან ასოცირდება" (http://www.pravoslavie.ru/sobytia/sbk-inn/tihon.htm) .
__________________
ყველაფერი, რაც კი ამ წიგნში ითქმება შტრიხ-კოდებზე, მომდინარეობს იმ ვარაუდიდან, რომ მათში მართლაცდა არის ავადსახსენებელი ანტიქრისტეს რიცხვი (666). სხვაგვარად ეს პრობლემა საერთოდ მოაკლდება საღვთისმეტყველო განზომილებას და, უბრალოდ, განსახილველად ადამიანისა და მომხმარებელთა უფლებების კომიტეტს უნდა გადაეცეს.
ყოველ შემთხვევაში, შტრიხ-კოდში არსებული ექვსიანების საკითხთან დაკავშირებული შეცდომა ეს არის შეცდომა მათემატიკაში და არა ღვთისმეტყველებაში, მათემატიკაში, და არა სულიერ ცხოვრებაში. ამიტომაც აქ შეცდომის დაშვება საშიში არ არის.
ცუდია ის, რომ ეკლესიურმა ადამიანებმა, ამდენს რომ იღვწიან შტრიხ-კოდებში ექვსიანთა არსებობის დასამტკიცებლად, ემოციური რეაქცია რაციონალურ ანალიზზე მაღლა დააყენეს. ჯერ მოდის - პროტესტის წერილები და ხმამაღალი განცხადებები, და მხოლოდ ამის შემდეგ მოჰყვება მას - სპეციალისტებთან დაკავშირების პირველი მცდელობები (3).
__________________
3. მაგალითად, გაირკვა, რომ შტრიხ-კოდური ნიშანს ინდივიდუალური საგადასახადო ნომრის (რუს. ИНН. შემდეგში - ისნ. – "აპოკ." რედ.) მინიჭების განაცხადის ბლანკზე არაფერი აკავშირებს არც იმ ინფორმაციასთან, რაც მოცემულია თვით ამ განცხადებაში, არც განმცხადებლის სახელთან და არც მის მომავალ ისნ-სთან. ეს არის მხოლოდ თვით ფურცლის კოდი, უფრო ზუსტად - იმ "ფორმისა", რომელსაც ის ეხება (ფორმა 12-2-2), და ამიტომაც ეს შტრიხ-კოდი ერთნაირია ყველა განაცხადზე - რამდენი მილიონიც გინდ იყოს ის დაბეჭდილი და შევსებული. სხვა დანიშნულების "ფორმათა" ბლანკებს ექნებათ სხვა შტრიხ-კოდები. ასეთ შემთხვევაში კი არავითარი განსხვავება არ არის კონსერვირებული ქილის ყიდვასა იმ ბლანკის შევსებას შორის, რომელიც აღნიშნულია მისთვის დამახასიათებელი შტრიხ-კოდით, რადგან ყოველ ნივთს მისთვის დამახასიათებელი შტრიხ-კოდი აქვს მინიჭებული. თავად შტრიხ-კოდი თუ იწვევს შეშფოთებას, მაშინ უკვე შეუძლებელი ხდება რაიმე სახის ფინანსური, საბანკო და სხვა დოკუმენტებზე ხელის მოწერა, რადგან ყველა მათგანს ახლავს თავისი შტრიხ-კოდი...
__________________
მეტიც, დღემდე არც ჩატარებულა არც ერთი "მრგვალი მაგიდა" საერო მათემატიკოსთა მოწვევით. თუკი საკითხი ასე მნიშვნელოვანია და დისკუსიურია (საგადასახადო სამინისტრო კატეგორიულად უარყოფს ექვსიანების არსებობას შტრიხ-კოდებში) - მაშინ ღირს მოეწყოს სერიოზული და ერთობლივი ანალიზი, რომელშიც მოდავეთა ყოველი ნაბიჯი გადამოწმებული და განხილული იქნება. მაგრამ ეს არ მომხდარა. "ჩვენმა სპეციალისტებმა" (4), რომლებმაც "დაამტკიცეს" გამყოფი შტრიხებისა და ექვსიანების იდენტურობა, იციან, რომ თვით ამ პროგრამის შემქმნელი სხვაგვარად ფიქრობს (5), - მაგრამ, მიუხედავად ამისა, სხვის მიერ შექმნილ პროგრამას თავისებურად განმარტავენ...
__________________
4. მაგალითად, "ვიმედოვნებ, თქვენ არ გეეჭვებათ ჩვენი ექსპერტის გამოცდილება? - არა, რას ამბობთ! მე მწამს, რომ ის გამოცდილია, და მწამს, რომ ის თქვენია" (Г.К.Честертон. Неожиданная удача Оуэна Гуда // Избранные произведения. М., 1994, т. 3, с. 26).
5. "ამერიკელი ჯ. ლორერი (G. J. Laurer), მოცემული სიმბოლიზმის ავტორი, ასევე ბ-ნი ვ. კოროსტელევი, ავტომატური იდენტიფიკაციის ელექტრონულ სისტემათა ასოციაციის დირექტორი, მასთან ერთად საკითხის არსში ვერ გარკვეული დიაკვანი ანდრია კურაევი, ამტკიცებენ, რომ შტრიხ-კოდებში რიცხვი 666 არ არსებობს" (Ахрамеев В., Башкиров И. ИНН – действительно путь в преисподнюю. Наши специалисты доказали наличие трех шестерок в штрих-коде // Русский вестник. 2000, №№ 37-38.) Статья, доказывающая нетождественность разделительных линий “шестеркам” — http://orthodoxy.newmail.ru/apostasia/zarubin.htm.
__________________
შედეგად ექვსიანების არსებობის საკითხი შტრიხ-კოდებში ჯერაც რწმენის საგნად რჩება (თანაც ის, ვინც უარყოფს მათემატიკურ ჰიპოთეზას ამ ხაზებისა და ექვსიანების იგივეობის შესახებ, მათგან, ვისაც შტრიხ-კოდებში ექვსიანების არსებობა სწამს, უკვე ბრალდებული ხდება მართლმადიდებლობისგან განდგომაში!..).
თუმცა, შტრიხ-კოდებში ექვსიანები რომც იყოს, მაშინაც კი არ იქნება მათში რიცხვი 666. რადგან აქ გვაქვს უბრალოდ სამი განცალკევებული ციფრი 6. თუ მე მიყოლებით დავწერ ციფრებს 1234567890 - ეს არ ნიშნავს, რომ მე დავწერე რიცხვი 150 (თუმცა ამ რიცხვის ყველა კომპონენტი, ანუ ყველა ციფრი, რომელთა დახმარებითაც აღინიშნება ეს რიცხვი, ჩემ მიერ დაწერილ ციფრთა რიგში არსებობს).
ზუსტად ასევე ციფრთა კრებულში 601234567890126 არ არის რიცხვი 666 (თუმცა ამ რიცხვის კომპონენტები აქ არსებობს). მოდი, ხმამაღლა წარმოთქვით დაწერილი რიცხვი. ეს იქნება - "ექვსას ერთი ტრილიონ ორას ოცდათოთხმეტი მილიარდ ხუთას სამოცდა შვიდი მილიონ რვაას ოთხმოცდა ათი ათას ას ოცდა ექვსი". ახლა რას იტყვით? - წააგავს ეს "ექვსას სამოცდა ექვსს"?
ასევე, როგორც ადამიანი, რომელიც იყენებს სიტყვას "რაისობესი", სინამდვილეში არ ახსენებს ეშმაკებს (რუს. "ბეს" - ეშმაკი"), და არ მოუწოდებს მათ, ასევე კაციც, რომელიც ადგენს შტრიხ-კოდებს თუნდაც ციფრ ექვსის სამჯერადი გამოყენებით, სინამდვილეში არ იყენებს რიცხვს 666-ს.
კომპიუტერი შტრიხ-კოდების გამყოფ ხაზებში რომც ხედავდეს სამ ექვსიანს, მას არ შეუძლია მათი შეთავსება - ყველაზე უკიდურეს შემთხვევაში ხაზების თითოეულ ნაკრებს ის ჩვეულებრივ ექვსიანად ჩათვლის. კომპიუტერი განაპირა შემზღუდავ ხაზებში ექვსიანებს თუ ხედავს, მას არ შეუძლია უბრალოდ ამოაგდოს ყველა ციფრი, რომლებიც მათ შორის (ანუ ამ ექვსიანებს შორის) არის მოთავსებული. და, მაშასადამე, ის ხედავს ასეთ სურათს 612345767543216. არსებობს ერთი ციფრი 6, არსებობს მეორე ციფრი 6, და არსებობს მესამე ციფრი 6. მაგრამ რიცხვი - 666 აქ არ არსებობს!
ასე რომ არსებითად, ისინი, ვინც შტრიხ-კოდში რიცხვ 666 ხედავს, უბრალოდ "გამოცნობანას" თამაშობენ - ცდილობენ შეადგინონ ახალი სიტყვა ასოებისგან (ელემენტებისგან), რომლებიც მოცემულია სრულიად სხვა სიტყვაში (როგორც მაგალითად, სიტყვაში "არქიმანდრიტი" თამაშობით შეიძლება ვიპოვოთ ან შევადგინოთ სიტყვა "მიტრა", სიტყვაში "ეკლესია" ვიპოვო "სია" ან შევადგინოთ "ეკალი" და ა. შ.).
გავიხსენოთ კიდევ, რომ საკუთრივ "ციფრი" დაწერილობას არ შეიცავს. არსებობს - ასოები: ხი-ქსი-ძეტა. საეკლესიო სლავურ თარგმანში ეს ასოებია хер-кси-зело. რიცხვი 666, დაწერილი არაბული ციფრებით, შედგება ერთნაირი კომპონენტებისგან (ექვსიანებისგან). მაგრამ წმიდა წერილის ბერძნულ ორიგინალში ასე როდია. აქ ყოველი ციფრი, რომელიც ამ რიცხვში შედის, სხვადასხვანაირად იწერება (6).
__________________
6. მოსკოვის სახელმწიფო უნივერსიტეტის პროფესორი ა. ჩ. კოზარჟევსკიმ ყურადღება მიაქცია იმას, რომ რიცხვ 666-ის ბერძნულ დაწერილობაში - χ ξ ζ ცენტრალური ასო "ქსი" მოხაზულობით წააგავს გველს, მაშინ როდესაც პირველი და ბოლო ასოები შეადგენენ ბერძნულ სახელს "ქრისტე" ("ხრისტოს"); შესაბამისად, ანტიქრისტე - ეს არის ის, ვინც თავს მოაჩვენებს ქრისტედ (Козаржевский А. Ч. Источниковедческие проблемы раннехристианской литературы. М., 1985, с. 87).
__________________
ფანტაზია, რომლის თანახმადაც "ელექტრონული ბეჭედი", თუკი ის დატანებული იქნება სხეულზე, სწორედ დღევანდელი შტრიხ-კოდის სახის იქნება, შეიძლება სულიერად საშიში აღმოჩნდეს. რადგან დღვანდელი შტრიხ-კოდი საკმაოდ პრიმიტიულია და მალე გადაივლის. ანტიქრისტეს ბეჭდის ასეთი ცალმხრივი განმარტება იმითაა საშიში, რომ თუკი მხეცის დაღი სხვანაირი იქნება (სხვა ტექნოლოგიითა და სხვაგვარი გარეგანი მოხაზულობით) - მაშინ ადამიანი, რომელმაც დღევანდელ ჭორებს დაუჯერა, მოტყუებული აღმოჩნდება.
გარდა ამისა, შტრიხ-კოდი შეუძლებელია იყოს ანტიქრისტეს ბეჭედი იმ მიზეზით, რომ მხეცის რიცხვი მასში, რბილად რომ ვთქვათ, არც ისე აშკარაა. ანტიქრისტეს დაღის აზრი იმაშია, რომ ყველამ - და თვით ადამიანმაც, მისმა ახალმა მეპატრონემ, ასევე მთელმა გარმომცველმა საზოგადოებამ, იცოდეს, თუ ეს საცოდავი ადამიანი ვის ემსახურება...
კარგი, დავუშვათ, რომ მართლაცდა ერთგვარმა სუპერდახვეწილმა პროგრამამ გამყოფი შტრიხები ერთ მთლიანობად გამოჰყო, შეაერთა და ყოველ მათგანს ციფრული მნიშვნელობა მიანიჭა, რომლის ერთობლიობა რიცხვ 666-ად იკითხება. თანაც ყველაფერს ისე აკეთებს, რომ ვერავინ, პროგრამის შემქმნელის გარდა, მის ამ თავისებურებებს ვერ ამჩნევს. დავუშვათ, ჩვენთვისაც ცნობილი გახდა, რომ ეს "ხრიკი" პროგრამის შემქმნელმა გაანდო ქვეყნის ხელისუფლებას, რომელსაც მან თავისი პროგრამა მიჰყიდა და, რომელმაც შემდეგ ეს პროგრამა მოსახლეობასთან ურთიერთობისთვის გამოიყენა.
აი აქ უკვე ჩნდება შტრიხ-კოდების საკითხის საღვთისმეტყველო განზომილება.
საღვთისმეტყველო მნიშვნელობა გააჩნია საკითხს არა იმის შესახებ, დამალულია თუ არა ექვსიანები შტრიხ-კოდში (მითუმეტეს, თუკი ისინი სწორედაც რომ დამალულია - მაშინ ქრისტიანი არანაირი პასუხისმგებლობა არ ეკისრება იმისთვის, რომ მისგან გასაიდუმლოებული რაღაც აიღო). ღვთისმეტყველებისთვის მნიშვნელოვანია კითხვა - როგორ უნდა მოიქცეს ქრისტიანი სამყაროში, რომელშიც არაქრისტიანული და ანტიქრისტიანული სიმბოლიკა ყოველ ნაბიჯზე ხვდება?
ამრიგად, ყველაფერი შემდგომი დაიწერება იმ ვარაუდიდან გამომდინარე, რომ ანტიქრისტიანული სიმბოლიკა არის (ან იქნება) ახალ სახელმწიფოებრივ დოკუმენტებშიც.
კიდევ ერთი ამოსავალი პირობა ამ წიგნის აგებულებისას გახლავთ ვარაუდი იმისა, რომ სახელმწიფო, სპეციალურად მორწმუნეებისთვის, ალტერნატიულ საგადასახადო აღრიცხვას და საქმის წარმოებას არ დაეთანხმება. რა იქნება, თუკი დიალოგი ეკლესიასა და სახელმწიფო ხელისუფლებას შორის ამ თემაზე ჩიხში მოექცევა და "სოციალური ნომრები" სავალდებულო გახდება? ამის შესახებ - ცოტა მოგვიანებით ვიმსჯელებთ.
კვლავ გავიმეორებ: ბრძოლა ტოტალური ელექტრონული კონტროლის წინააღმდეგ - საჭიროა. მაგრამ ასევე საჭიროა ადრიდანვე დავფიქრდეთ იმაზე როგორ ვიყოთ, ჩვენი სამოქალაქო ბრძოლა სამოქალაქო გამარჯვებითვე თუ არ დასრულდა? როგორ ვიმოქმედოთ მაშინ, რათა სამოქალაქო და პოლიტიკური წარუმატებლობა სულიერ დამარცხებად არ შემოგვიბრუნდეს?
ამ საკითხის განხილვისას საჭიროა შევიგნოთ, რომ ის სხვადასხვა ურთიერთგადაჯაჭვული ქვესაკითხებისგან შედგება, ესენია: ქრისტიანის დამოკიდებულება ახალი მსოფლიო წესრიგისადმი, რომლის დროსაც ჩვენ უნივერსალური სახელმწიფოს მოქალაქეები ვხდებით; ქრისტიანის დამოკიდებულება ახალი კომპიუტერული ცივილიზაციისადმი მისი ელექტრონული დოსიეებითა და დოკუმენტებითურთ; შტრიხ-კოდების სიმბოლიზმსა და ქრისტიანთა მხრიდან იმ საგნებთან ურთიერთობაზე, რომლებიც შტრიხ-კოდებით არიან აღბეჭდილნი; დასაშვებია თუ არა საგადასახადო ნომერი და სხვა.
გაგრძელება იქნება.
წყარო: https://predanie.ru/book/187435-segodnya-li-dayut-pechat-antihrista-pyatnadcat-voprosov-ob-inn/